Echo

Guter Spruch im Titel, unser ehemaliger Magazingestalter Thomas Armborst ist mit einer Illustration vertreten und das Editorial ist ein Zückerli. Die letzten Ausgaben, auch die Fussball, gibt´s bei uns im Laden. Jetzt aber bitte lesen!

EDITORIAL

Mir doofe Dütsche

dänke ja, wenn e Schwiizer Dütsch redt mit Schwiizer Iischlag, de sigi das Schwiizerdütsch. Wenn är aber würklech Schwiizerdütsch redt, de verschtöh mir gar nüt meh. U weme als Dütsche z’Züri oder z’Bärn oder z’Basel jammeret, dass me gar nüt meh verschteit, de bechunnt me öppis z’ghöre, nämlech: me sigi en arrogante Depp (wül die Dütsche d’Schwiiz sowieso für ne Teil vo Dütschland halte). U weme de bim Wiiterschwätze meint, das chönn ja jede: so ne blüehigi Wirtschaft uf d’Bei stelle mit emene Huufe Milliarde, wo me nid wot wüsse, wohär si chöme – de isch dr Tag z’Züri oder z’Basel oder z’Bärn gloffe.

Mir Dütsche sige weni international, arrogant u z’blöd, für allne e Vollziitbeschäftigung z’bringe. D’Schwiizer sige bieder, brav u mit ihrem komische Bankgheimnis d’Handlanger vo Kriminelle. Eso töne hie u dert d’Vorurteil, wo bsunders i de vergangnige Jahr ds Verhältnis belaschtet hei. Uf aui Fäll isch es es gfundnigs Frässe für d’Medie.

Derbii isch das, wo mir zäme hei, vil grösser als das, wo üs trennt. Vil isch gschribe worde über die dütsche Gaschtarbeiter, wo i Chrankehüser u Redaktione de Schwiizer d’Jobs wägnäh u sich i de Zürcher Bars uffüehre, als sige si hie dehei. Zvil isch über settigs gschribe worde. I däm Magazin läset dir nüt zum chindische Schtriit über dütschi Emigrante ir Schwiiz u schlächts Dütsch vo de Schwiizer. Für ds Magazin hie hei Schwiizer u Dütschi zämegschaffet. Wül d’Schwiizer ja nid id EU wei, müesse mir se wenigschtens i ds Heft hole.

Zäme verzeue mir vo dr Sehnsucht vo de Schwiizer nach em Meer, vo ihrem kuurlige Verhältnis zu Suchtmittel u ihrem Heiweh, wenn si a ihres Land dänke. Mir bsueche dr grossartig Erich von Däniken (Ufo), z’Grab vom Albert Hoffmann (LSD) u d’Borderline-Journalischte, wo aui gliich heisse (Roger). U natürlech zeige mir mängs meh i däm Heft.

Z’erschte Mau ir Gschicht vo DUMMY het d Grafik en Artdiräktion im Usland gmacht – ds Büro Raffinerie in Züri. Ihri Philosophie heisst Putze u Veredle. Däm hei mir üs gärn aagschlosse. Vil Spass bim Läse u Luege!

Ds nächschte DUMMY zum Thema «Neger» chunnt am 15. Septämber 2008